परतवाडा : खुल्या प्रवर्गातील आर्थिकदृष्ट्या दुर्बल घटकांसाठी कार्यरत असलेल्या अमृत या राज्य शासनाच्या स्वायत्त संस्थेच्या योजनांची माहिती देणारे केंद्र अमरावती जिल्ह्याच्या अचलपूर तालुक्यातील परतवाडा येथे सुरू झाले आहे. संस्थेचे व्यवस्थापकीय संचालक विजय जोशी यांच्या हस्ते रोहित पांडे यांच्या सेतू केंद्रामध्ये या अमृत माहिती केंद्राचे उद्घाटन झाले. लक्ष्यित गटाच्या सर्वांगीण प्रगतीसाठी अमृत संस्थेतर्फे राबवल्या जात असलेल्या विविध योजनांची माहिती या केंद्राद्वारे तालुक्यातील इच्छुक लाभार्थ्यांना मिळणार आहे.
उद्घाटनप्रसंगी बोलताना विजय जोशी यांनी उपस्थितांना अमृत संस्थेची संकल्पना, कार्यपद्धती आणि उद्दिष्टे याबाबत सविस्तर माहिती दिली. ‘उद्योजक घडवणे हे अमृत संस्थेचे मुख्य ध्येय असून, युवकांनी आत्मनिर्भर बनून उद्योजकतेकडे वळावे,’ असे आवाहन त्यांनी केले. ‘अमृत’सोबत नवा संकल्प घेऊन समाजात सकारात्मक बदल घडवावेत, असे आवाहन त्यांनी उपस्थितांना केले.
या कार्यक्रमाला संस्थेचे प्रबंधक संचालक सिद्धेश्वर वरणगावकर, राज्य व्यवस्थापक दीपक जोशी, नाशिक विभाग व्यवस्थापक मंगेश खाडिलकर, अमरावती विभाग व्यवस्थापक प्रवीण कोळेश्वर, अमरावती जिल्हा व्यवस्थापक केदार गोगरकर, तसेच अमरावती जिल्हा उप-व्यवस्थापक हृषीकेश कथलकर उपस्थित होते. या वेळी लक्ष्यित गटातील नागरिकांनी मोठ्या संख्येने उपस्थित राहून योजनांची माहिती जाणून घेतली. ब्राह्मण समाज व मारवाडी समाजातील अनेक मान्यवर नागरिकही या कार्यक्रमाला उपस्थित होते.
कार्यक्रमाच्या शेवटी विजय जोशी यांनी रोहित पांडे यांना अमृत माहिती केंद्राच्या यशस्वी कार्यासाठी शुभेच्छा दिल्या.
अमृत संस्थेविषयी :
महाराष्ट्र संशोधन, उन्नती व प्रशिक्षण प्रबोधिनी अर्थात अमृत ही राज्य शासनाची स्वायत्त संस्था असून, खुल्या प्रवर्गातील ज्या जातींना दुसऱ्या कुठल्याही शासकीय संस्था किंवा महामंडळे यांच्या योजनांचा लाभ मिळत नाही, अशा जातींमधील आर्थिकदृष्ट्या दुर्बल घटक हा अमृत संस्थेचा लक्ष्यित गट आहे. त्यामध्ये ब्राह्मण, कोमटी, मारवाडी, ठाकूर, गुजराती, सिंधी, कायस्थ, जाट, बणिया, बंत्स, नायर अय्यंगार, पाटीदार, बंगाली, पटेल, येलमार, त्यागी, सेनगुनथर, राजपुरोहित, नायडू, एलमार इत्यादींचा समावेश आहे. अशा जातींमधल्या वार्षिक उत्पन्न आठ लाख रुपयांपेक्षा कमी असलेल्या व्यक्ती अमृत संस्थेच्या विविध योजनांचा लाभ घेऊ शकतात.
अधिक माहितीसाठी आपापल्या जिल्ह्यातील ‘अमृत’ कार्यालयाशी संपर्क साधावा. तसेच, ‘अमृत’चे संकेतस्थळ आणि सोशल मीडिया हँडल्स पाहावीत.
संकेतस्थळ : https://mahaamrut.org.in/
इन्स्टाग्राम : https://www.instagram.com/mahaamrut_official/profilecard/?igsh=MW04OHNnamxweXZlbA==
फेसबुक : https://www.facebook.com/share/1CGYUSjznh/?mibextid=qi2Omg
अमृत या महाराष्ट्र शासनाच्या स्वायत्त स्वायत्त संस्थेच्या योजनांची खरी सुरवात होणार अमृत कौशल्य प्रशिक्षण योजनेअंतर्गत होणार !